شوبهەی یەكەم
فەرمودەكەی پەیامبەر صلى الله عليه وسلم لەسەر حەوز
ئەڵێن: پەیامبەری خوا صلى الله عليه وسلم فەرمویەتی: (خەڵكانێك دێن بۆ لام، دەیانناسمەوە و دەمناسنەوە، پاشان بە توندی لە حەوزەكە دوور دەخرێنەوە، منیش ئەڵێم: هاوەڵەكانم، پێم دەگوترێ: تۆ نازانی دوای تۆ چیان كرد). (1)
ئەم فەرموودەیە چەندین ڕێگا و چەندین ڕیوایەتی هەیە:
لەوانە: (من لەسەر حەوزم چاوەڕێ دەكەم بزانم كێ لە ئێوە دێ بۆلام، بەڵام خەڵكانێكم لێ دەبرێن، منیش ئەڵێم: ئەی پەروەردگارم، لە منن و لە ئوممەتەكەی منن، پێم دەڵێن: ئایا نەتزانی دوای تۆ چیان كردوە؟ سوێند بەخوا دوای تۆ ئەوەندەی نەبرد هەڵدەگەرانەوە لە دینی خۆیان.
پاشان ئیبن ئەبی مولەیكە ـ هەواڵخوانی فەرموودەكە- وتی: ئەی پەروەردگارا پەنات پێ دەگرین لەوەی هەڵگەڕێینەوە). (2)
وڕیوایەتی دووەم: (ئەمن پێشتان دەكەوم و لە پێشتانەوە لەسەر حەوزەكەم، خەڵكانێك دێن بەڵام لێم دەبرێن، ئەڵێم: پەروەردگارم، هاوەلەَكانم، هاوەلەَكانم، پێم دەگوترێ: تۆ نازانی دوای تۆ چیان كرد). (3)
بۆ وەڵامی ئەم شوبهەیەش:
یەكەم: مەبەست لە هاوەڵ لێرەدا ئەو مونافیقانەن كە لە سەردەمی پەیامبەردا صلى الله عليه وسلم خۆیان بە موسڵمان پیشانداوە، هەروەكو خوای گەورە دەفەرموێ:[إِذَا جَاءَكَ الْمُنَافِقُونَ قَالُوا نَشْهَدُ إِنَّكَ لَرَسُولُ اللَّهِ وَاللَّهُ يَعْلَمُ إِنَّكَ لَرَسُولُهُ وَاللَّهُ يَشْهَدُ إِنَّ الْمُنَافِقِينَ لَكَاذِبُونَ]{المنافقون 1}. واتە: (ئەی پەیامبەر كاتێك دەغەڵ و دووڕوەكان بێنە لات، دەڵێن: شایەتی دەدەین كە بەڕاستی تۆ پەیامبەری خوایت و خوا خۆی دەزانێ كە تۆ پەیامبەری ئەوی، خواش شایەتی دەدات كە ئەو مونافیقانە درۆزنن ).
بۆیە ئەمانەش لەو مونافیقانەن كە پەیامبەری خوا صلى الله عليه وسلم پێی نەزانیوون، هەروەكو خوای مەزن دەفەرموێ: [وَمِمَّنْ حَوْلَكُمْ مِنْ الأَعْرَابِ مُنَافِقُونَ وَمِنْ أَهْلِ الْمَدِينَةِ مَرَدُوا عَلَى النِّفَاقِ لا تَعْلَمُهُمْ نَحْنُ نَعْلَمُهُمْ سَنُعَذِّبُهُمْ مَرَّتَيْنِ ثُمَّ يُرَدُّونَ إِلَى عَذَابٍ عَظِيمٍ]{التوبة 101}. واتە: (لەو عەرەبە دەشتیەكانەی كە لە دەورو بەرتاندان مونافیقانێك هەن وە هەندێ لە خەڵكی مەدینەش لەسەر دوو ڕوویی ڕاهاتوون و زرنگن لەو بارەیەوە، تۆ نایانناسی ئێمە چاك دەیانناسین، ئەوانە دووجار سزایان دەدەین، دواتریش دەگەڕێندرێنەوە بۆ سزایەكی گەورە). جا ئا ئەوانە لەو مونافیقانەن كە پەیامبەری خوا صلى الله عليه وسلم وایدەزانی لە ئەسحابەكانی وین، بەڵام واش نەبوون.
دووەم: مەبەست پێیان ئەوانەن كە لە دوای وەفاتی پەیامبەری خوا صلى الله عليه وسلم هەڵگەڕاونەتەوە، ئەوەبوو زۆرێك لە عەرەب دوای وەفاتی پەیامبەر صلى الله عليه وسلم هەڵگەرایەوە، بۆیە ئا ئەمانەن كە پەیامبەری خوا صلى الله عليه وسلم دەفەرموێ: (هاوەڵەكانم، پێی دەوترێ: تۆ نازانی دوای تۆ چیان كرد هەركە بەجێیانت هێشت دوای تۆ هەڵگەرانەوە).
سێیەم: مەبەست پێی: واتای هاوەڵە بە شێوەی گشتی، یانی: هەر كەسێ هاوەڵی و هاوڕێیەتی پەیامبەری خوای صلى الله عليه وسلم كردبێ با ئیمانیشی نەهێنا بێ، ئەمانە مانای هاوەڵ لە ڕوی زاراوەییەوە نایانگرێتەوە، بەڵگەش بۆ ئەمە ئەوەیە، كاتێك سەرۆكی مونافیقەكان عەبدوڵڵای كوڕی ئوبەی كوڕی سەلول وتی: [لَئِنْ رَجَعْنَا إِلَى الْمَدِينَةِ لَيُخْرِجَنَّ الأَعَزُّ مِنْهَا الأَذَلَّ] (4){المنافقون8}. ئەم قسەیەیان بۆ عومەر گێڕایەوە، وتی: ئەی پەیامبەری خوا صلى الله عليه وسلم ئیزن بدە با لە گەردنی ئەم مونافیقە بدەم، پەیامبەری خوا صلى الله عليه وسلم فەرمووی: (نا وازی لێ بێنە، با خەڵك نەڵێن موحەممەد هاوەڵەكانی خۆی دەكوژێت). (5)
دەبینی پەیامبەری خوا صلى الله عليه وسلم دەیكات بە هاوەڵی خۆی، ئەمەش لەسەر واتا زمانەوانییەكەی نەك زاراوییەكەی؛ چونكە عەبدوڵڵای كوڕی سەلول سەرۆكی مونافیقەكان بووە و لەو كەسانەیە وا خوا ڕیسوای كرد و نیفاقی خۆی ئاشكرا كرد.
چوارەم: پێ ئەچێت مەبەست لە ووشەی (هاوەڵەكانم) هەموو ئەو كەسانە بێت كە هاوەڵێتی پەیامبەری خوا صلى الله عليه وسلم دەكەن لە گرتنە بەری ڕێگاكەی پەیامبەر، ئەگەر چی نەشیان بینی بێت، بەڵگەش بۆ ئەمە ڕیوایەتی: ( ئوممەتەكەم)ـە، یان (ئەوانە ئوممەتی منن).
سەبارەت بەو ووتەیەی پەیامبەریش صلى الله عليه وسلم كە دەفەرموێ: (دەیانناسمەوە )، پەیامبەری خوا صلى الله عليه وسلم خۆی ڕونی كردۆتەوە كە ئەم ئوممەتە دەناسێتەوە، وتیان: قوربان چۆن دەیانناسیەوە و نەشیانت بینیوە؟ دەفەرموێ: (بە شوێنەواری دەست نوێژەكانیانەوە دەیانناسمەوە ). (6)
هەروەها ئەوەی كە ئەمە پشت ڕاست دەكاتەوە، تێگەیشتنەكەی ئیبن ئەبی مولەیكەیە - هەواڵخوانی فەرمودەكە- كاتێك كە ئەڵێت: (خوایە گیان پەنات پێ دەگرین لەوەی هەڵگەڕێینەوە) كەچی لە تابعینە.
دوای ئەوەش ئەم فەرمودەیە نە خەوارج و نە نەواصب و نە موعتەزیلە، هیچ كام لەمانە نەیانكردۆتە بەڵگە، تەنها شیعە نەبێت، بۆ هەڵگەڕانەوەی هاوەڵانی پەیامبەر صلى الله عليه وسلم كردویانەتە بەڵگە.
ئەو كات پێیان دەوترێ: ئەی باشە چی عەلی و حەسەن و حوسەین و ئەوانی تریش لە ئەهل و بەیتی پەیامبەر صلى الله عليه وسلم لەو هاوەڵانە دەردەكات؟ چی ڕێگرە لەوەی كە ئەمانیش لەوانە بن وا هەڵگەراونەتەوە؟
بەڵام ئێمە هەرگیز ئەوە ناڵێین، حاشا و دوور لەوان، تەنانەت ئێمە ئەوانە بە ئیمام دەزانین و ئەڵێین بەهەشتین، هەروەكو پەیامبەری خوا صلى الله عليه وسلم لە بارەی عەلییەوە رضي الله عنه فەرمویەتی- كاتێك لەسەر كێوی (حیراء) بوون-: جێگیر بە ئەی (حیڕاء) ئەوەی لەسەر پشتی تۆیە پەیامبەر و صدیق و شەهیدە)(7)، جا لەوكاتە عەلیش رضي الله عنه لەگەڵ پەیامبەری خوادا صلى الله عليه وسلم بوو بۆیە لە ئەهلی بەهەشتە.
هەروەها لە پەیامبەری خواوە صلى الله عليه وسلم سابت بووە كە فەرموویەتی: (حەسەن و حوسەین گەورەی گەنجانی بەهەشتن ). (8)
وە ئەگەر ڕەفزكەرەكان وتیان: ئەبوبەكر و عومەر و ئەبا عوبەیدە، باقی هاوەڵەكانی تری پەیامبەر صلى الله عليه وسلم ، لەوانەن كە لە حەوزی پەیامبەر صلى الله عليه وسلم پەڕاگەندە دەكرێن؟ !
ئەوكات چی ڕێگری نەواصبەكانە كە بڵێن: عەلیش بەهەمان شێوە لەو كەسانەیە كە لە حەوز دوور دەخرێنەوە.
خۆ ئەگەر ووترا: عەلی فەزڵەكانی باسكراون و چەسپاون؟
ئەوكات وەڵام دەدرێنەوە: ئەی جا فەزڵی لەوە زۆرتر بۆ ئەبوبەكر و عومەر باسكراون و چەسپاون.
==========================
(1) صحيح البخاري: كتاب التفسير، باب كما بدأنا أول خلق نعيده (4740).
(2) صحيح البخاري: كتاب الرقاق، باب حديث في الحوض (6593).
(3) صحيح مسلم: كتاب الطهارة، باب استحباب اطالة الغرة حديث (249).
(4) واتە: هەركە گەڕاینەوە بۆ مەدینە با دەسەڵاتدار و بەڕێزەكان، لات و بێ ڕێزەكان وەدەر نێ).
(5) صحيح البخاري: كتاب التفسير، باب قوله [ سواء عليهم أستفرت لهم ] حديث (4905).
(6)(صحيح مسلم): كتاب الطهارة، باب استحباب اطالة الغرة والتحجيل في الوضوء، حديث (249). ئەمەش دەقەكەیەتی: لە ئەبی هەرەیرەوەوە دەڵێ: پەیامبەری خوا صلى الله عليه وسلم هات بۆ گوڕستان و فەرمووی: السلام علیكم، ماڵی گەلی ئیمانداران، ان شاو الله ئێمەش پێتان دەگەین و پێم خۆش بوو براكانمان ببینیایە) وتیان: بۆ ئەی پەیامبەری خوا صلى الله عليه وسلم ئەی ئێمە برات نین؟ فەرمووی: )ئێوە هاوەڵی منن، براكانمان ئەوانەن كە هێشتا نەهاتوون)، وتیان: ئەی پەیامبەری خوا صلى الله عليه وسلم چۆن كەسانێك لە ئوممەتەكەت دەناسیەوە كە هێشتا نەهاتوون، پەیامبەر صلى الله عليه وسلم فەرمووی: (ئایا ئەگەر پیاوێك ئەسپێكی هەبێت نێوچاوانی سپی و لە پەلەكانی دا سیپێتی هەبێت، لە نێوان كۆمەڵە ئەسپێكی ڕەشی زۆردا ناناسرێنەوە؟) وتیان: بەڵێ قوربان دەناسرێتەوە. ئەویش فەرمووی: (دەی ئەوانیش بە نێوچاو سپی و پەل سپی بە شوێنەواری دەست نوێژەوە دێن و من لە پێشیانەوە لەسەر حەوزەكەم، جا خەڵكانێك لە حەوزەكەم بەتوندی دوور دەخرێنەوە، هەروەكو چۆن حوشتری سەرلێشێواو پەڕاگەندە دەكرێت، بانگیان دەكەم: دەی وەرن، بەڵام پێم دەووترێت: بەڕاستی ئەوانە دوایی گۆڕان. منیش دەڵێم: (ئەو لاتر بچن، ئەولاتر بچن).
(7) صحيح مسلم: كتاب فضائل الصحابة، باب فضائل طلحة والزبير (2417).
(8) سنن الترمذي: كتاب المناقب، باب مناقب الحسن والحسين حديث (3768). سنن ابن ماجة: المقدمة باب فضل علي بن أبي طالب حديث (118). مسند أحمد حديث (10616).