ناسینی پەیامبەری خوا صلى الله عليه وسلم هەر ئەوە نیە بە زمان بڵێین ئەیناسین و ناوی ( محمد ) ـە و پەیامبەری خوایە ، بەڵكو پێویستە ناسینەكە داخوازی كۆمەڵێ شت بكات بەبێ ئەوانە مرۆڤ سود لەو ناسینە نابینێ ، پێش هەموو شتێ گرنگی ناسینی پەیامبەری خوا صلى الله عليه وسلم لەوەدایە نێوەندی نێوان بەندەكان و خوای پەروەردگارە لە رونكردنەوەی شەرعی خوا و چۆنێتی پەرستنی ، وە دەبێ ئەم ناسینە داخوازی چەند شتێك بكات ئەوجا دەبێتە ناسینێكی دروست و سود بە موسڵمان ئەگەیەنێ :
1 / دەبێ ئەو ناسینە داخوازی ئەوە بكات كە قایل بین بەو رێنمایی و ئاینەی كە پێی هاتووە ، وە باوەڕكردن بەوەی كە هەواڵی پێداوە ، لە گەڵ گوێڕایەڵی كردنی فەرمانەكانی و دوركەوتنەوە لە قەدەغە كراوەكانی و فەرمان ڕەوایی كردن بەو شەریعەتەی پێی هاتووە لەگەڵ رازی بوون بە دادوەریەكەی . ناسینیش تەنها بە وتن نیە بەڵكو دەبێ بە كردەوە بیسەلمێنین .
2 / دەبێ ئەم ناسینە ببێتە هۆی ئەوەی لە ناكۆكی و كار و باری ئاین بگەڕێینەوە لای خۆی وەك خوای پەروەردگار ئەفەرموێ : [يَا أَيُّهَا الَّذِينَ آمَنُواْ أَطِيعُواْ اللّهَ وَأَطِيعُواْ الرَّسُولَ وَأُوْلِي الأَمْرِ مِنكُمْ فَإِن تَنَازَعْتُمْ فِي شَيْءٍ فَرُدُّوهُ إِلَى اللّهِ وَالرَّسُولِ ]النساء59 .
كە ئێستایش خۆی لە ژیان نەماوە دەگەڕێینەوە بۆ لای قورئانەكەی خوا و سوننەتی پەیامبەرمان صلى الله عليه وسلم بە تێگەیشتنی پێشینی ئەم ئوممەتە كە ئەوانیش هاوەڵانن
3 / .دەبێ ئەم ناسینە بە شێوەیەك بێت قسەی كەس پێش قسەی نەخەین و ڕاو بۆچونی كەس پێش راوبۆچونی نەخەین هەروەك ابن عباس فەرموویەتی : نزیكە لە ئاسمانەوە بەردتان بەسەردا داببارێت من دەڵێم : پەیامبەری خوا صلى الله عليه وسلم وای فەرمووە ، كەچی ئێوە دەڵێن : ( أبو بكر ، و عمر ) فەرموویانە !!!
هەروەها پێشەوا احمد ئەفەرموێ : سەرم سوڕماوە لە كردەوەی ئەو كەسانەی كە سەنەدی فەرموودەیان ناسیوە ، كەچی بۆچوونی ( سفیان ) وەردەگرن ، لەو لاشەوە خوای پەروەردگار فەرموویەتی : [ فَلْيَحْذَرِ الَّذِينَ يُخَالِفُونَ عَنْ أَمْرِهِ أَن تُصِيبَهُمْ فِتْنَةٌ ]
4 / پێویستە ئەو ناسینە وامان لێبكات ملكەچی بڕیارەكانی بین هەروەك خوای پەروەردگار ئەفەرموێ : [إِنَّمَا كَانَ قَوْلَ الْمُؤْمِنِينَ إِذَا دُعُوا إِلَى اللَّهِ وَرَسُولِهِ لِيَحْكُمَ بَيْنَهُمْ أَن يَقُولُوا سَمِعْنَا وَأَطَعْنَا وَأُوْلَئِكَ هُمُ الْمُفْلِحُونَ]النور51
هەروەها ئەفەرموێ : [فَلاَ وَرَبِّكَ لاَ يُؤْمِنُونَ حَتَّىَ يُحَكِّمُوكَ فِيمَا شَجَرَ بَيْنَهُمْ ثُمَّ لاَ يَجِدُواْ فِي أَنفُسِهِمْ حَرَجاً مِّمَّا قَضَيْتَ وَيُسَلِّمُواْ تَسْلِيماً ] النساء65
5 / دەبێت ئەم ناسینە ببێتە هۆی ئەوەی پێچەوانەی نەبینەوە هەروەك خوای پەروەردگار ئەفەرموێ : [ فَلْيَحْذَرِ الَّذِينَ يُخَالِفُونَ عَنْ أَمْرِهِ أَن تُصِيبَهُمْ فِتْنَةٌ ] پێشەوا ( ابن كثیر ): فەرمویەتی : گوێڕایەڵی پەیامبەری خوا صلى الله عليه وسلم پێشترە لە گوێڕایەڵی هەموو كەسێكی تر ، با چاكترینی ئەم ئوممەتە بن ، كە ( أبو بكر ، و عمر ) ن .
وە فەرموویەتی : وە وتەی خوای پەروەردگار كە فەرموویەتی : [ فَلْيَحْذَرِ الَّذِينَ يُخَالِفُونَ عَنْ أَمْرِهِ ] ، واتە : لە فەرمانی پەیامبەری خوا صلى الله عليه وسلم ، كە ڕێباز، و پەیڕەو ، و ڕێگا ، و سوننەت ،و شەریعەتەكەیەتی ، بۆیە دەبێت هەموو ووتە و كردەوەكان بە ووتە و كردەوەكانی ئەو بپێورێت ، جا ئەوەی هاوكۆك و هاودەنگ بوون لە گەڵ ئەودا وەردەگیرێت ، ئەگەر پێچەوانەش بوو لە گەڵیدا ، ئەوە ڕەتكراوەیە بە ڕووی خاوەنەكەی و ئەنجام دەرەكەی ، هەر كەسێك بێت .
6 /دەبێت ئەم ناسینە ببێتە هۆی خۆش ویستنی هەروەك خۆی ئەفەموێ : (( فَوَالَّذِي نَفْسِي بِيَدِهِ لَا يُؤْمِنُ أَحَدُكُمْ حَتَّى أَكُونَ أَحَبَّ إِلَيْهِ مِنْ وَالِدِهِ وَوَلَدِهِ)) صحيح البخاري
بەڵام خۆشویستنەكە لەبەر ئەوە نەبێ عەرەبە یان لەبەر خزمایەتی و لەبەر بەهێزی كەسایەتیەكەی نەبێت بەڵكو پێش هەموو شتێك لەبەر ئەوە بێت كە نێردراوی خوایە چونكە خۆش ویستن تەنها لەبەر خودی زاتەكە تەنها بۆ خوایە و نابێ بۆ كەسێكی تر ئەنجام بدرێ چونكە دەبێتە شیرك ، ئەوانەی لەبەر خزمایەتی خۆشیان ویست سودیان لەو خۆشەویستیە نەبینی وەك (ابو طالب) . لەم سەردەمەش هەندێ لە رۆژئاواییەكان رەنگە شایەتی بۆ بدەن وەك سەركردەیەكی بلیمەت و بە توانا ئەمانەش سود لەو بەرزراگرتنەی نابینن چونكە لەبەر خودی كەسایەتیەتی ، ئەم جۆرە خۆش ویستنەش تەنها دەبێ بۆ خوا تەرخان بكرێ .
هەربۆیە هەركەسێك ئیدعای خۆش ویستن و ناسینی پەیامبەری خوای كرد پێویستە بكۆڵێتەوە لە خۆی ئایە ئەو خاڵانەی سەرەوە لە خۆیدا جێ بەجێ ئەكات ؟ ئەگینا ناسینەكەی تەنها ئیدعایە و هیچ سودێكی لێ نابینێ ، ئەمەش تەنها دڵۆپێك بوو لە زەریای ئەم بابەتە ، چونكە زۆر زۆر زیاتر لەمە هەڵدەگرێ لەسەری بنوسین ، داواكارم لە خوای پەروەردگار هەموو موسڵمانێك سەركەوتو و موفق بكات بۆ ناسینی پەیامبەرەكەی بەو شێوەیەی خۆی پێی رازیە .