برام تۆ كاتێك دەرگا لە سەر خۆت دادەخەیت ، بەشێوەیەك كە كەس ناتبینێت ، لەو كاتەشدا پاڵنەرە شاراوەكانی ئارەزوو دێنەچالاكی و جووڵان و بەدوای دەروازەیەكدا دەگەڕێن كە لە ڕێگەیەوە بڕونە دەرەوە , ئا لەو كاتەدا و پێش ئەوەی ئەندامەكانت بخەیتەگەڕ بۆ ئەنجامدانی هەر تاوانێك , بیر لەوە بكەرەوە كە خوای گەورە دەتبینێ و دەزانێ چی لە ناختدا هەیە, خوای گەورە دەفەرمووێت :[ عَالِمُ الْغَيْبِ وَالشَّهَادَةِ الْكَبِيرُ الْمُتَعَالِي (9) سَوَاءٌ مِنْكُمْ مَنْ أَسَرَّ الْقَوْلَ وَمَنْ جَهَرَ بِهِ وَمَنْ هُوَ مُسْتَخْفٍ بِاللَّيْلِ وَسَارِبٌ بِالنَّهَارِ](الرعد) . واتە : خوای گەورە زانایە بە هەموو بینرا و و پەنهانییەك و لە هەموو شتێك گەورەترە و بڵند و باڵادەستە بە سەر هەموو شتێكدا ، یەكسانە بە لای ئەوەوە ئەگەر ئێوە ووتەی ئاشكرا بكەن یان بیشارنەوە ، یان لە تاریكی شەودا تاوان بكەن یان بە ئاشكرا و لە ڕۆژی ڕووناكدا ئەنجامی بدەن .
بۆیە برام خۆم تۆ ئەگەر لەو كاتەدا ئەم ڕاستیە بێنیتە یاد و پێش چاوی خۆت ئەوا هەرگـیز ناوێری تاوانەكە بكەی ، شاعیر دەڵێت :
وإذا خلـوت بريبـة في خلـوة والنفس داعية إلى العصيان
فاستحيي من نظر الإله وقل لهـا إن الذي خلق الظلام يراني
واتە : ئەگەر لە كاتی خەڵوەت و تەنیاییدا تووشی دڵە ڕاوكێیەك بووی و نەفست بۆ لای تاوان ڕای دەكێشایت, ئەوا شەرم بكە لە وەی كە خوای پەروەردگار دەتبینێت و بە نەفست بڵێ : ئەی نەفسی بەدكارم ئەوەی كە تاریكی درووست كردووە دەمبینێت .